තුන් සිත

Aug 31, 2012

ඔබෙන් සමු ගැනීම සදහා අවසර පතමි උතුමාණෙනි !!!

මරණයේ

දොරකඩට ගොස් ....

සිංහ පුතෙකුගේ එඩි පෙන්වා

යලි පැමිණි නුබ

රණ බිමේ..

කොල්ලෙනි

'නොහැක්කක් නොමැත'

මහා හයියෙන් මොර දුන්න නුබ..

සතුරු බලමුළු

සුනු විසුනු කොට ...

මවු බිමේ .... නාමයෙන්

අණ දුන්න සොදුරුතම සෙන්පතියාණෙනි ...

සංග්‍රාම භුමියේ .. උරෙනුර ගැටී ..

එකා පිට එකා මැරුණත්

අරමුණෙන් පිට නොයන හැටි

කියා දුන් ... විරුවාණෙනි

කිසිදි කිසි විට .. පසු නොබැස ගිය නුබ

නික්ම ගොස් ඇත .. ජීවිත බිමෙන්..

ඉඩ නොතියාම .. කිසිත් .. කියන්නට

මව් බිමේ උරුමය වෙනුවෙන්

අභිතව

යුධ වැදුන නුබ

මිහිදන්න්ව ඇත .. බොහෝ දුරකින් ..

'උතුමාණෙනි'

සමු ගැනීම සඳහා සියල්ල සම්පුර්ණයි'

ඔබෙන් සමු ගැනීම සදහා

අවසර පතමි

උතුමාණෙනි !!!!

ප.ලි. : - මේජර් ජෙනරාල් සමන්ත සුරියබණ්ඩාර, යනු ශ්‍රී ලංකා යුධ හමුදා කොමාන්ඩෝ බලකායේ සුවිශේෂිතම චරිතයක් විය, අවසන් මෙහෙයුම ආරම්භයේදී 53 වෙනි සේනාංකයට අණ දුන් එතුමා, අති දක්ෂ කොමාන්ඩෝ විරුවෙක් විය.

දේශපාලන හේතුන් මත සේවා කාලය තවත් වසර 10 කට වඩා ඉතිරිව තිබියදී දඩුවම් විශ්‍රාම ගැන්වූ ඒතුමා, තම දිවි දෙවෙනි කොට රැකි මාතෘ භුමිය හැර ඕස්ට්‍රිලියාවේ පදිංචියට යාමට සිදු වුයේ , තමාට හිමි විශ්‍රාම වැටුම පවා නොලැබුන තත්වයක් මත වීම , සහ අඩුම තරමේ ඔහුද එක් වී රැක දුන් මව් බිමේ මිහිදන් වීම පවා අහිමි වීම. කොතරම් ශෝචනීයද???

උදේ හවස රණ විරුවන් ගැනම සිතන , රණ විරුවන් පුදන දේශයක සැබෑ රණ විරුවන් අකාලයේ දැයෙන් වෙන් කිරීම .. දේශ ප්‍රේමයද?

Aug 27, 2012

සිහිවටනය

පැය ගණන්

දින ගණන් ..

සති ගණන් ..

ඔබේ ආදරේ ඉල්ලන්න

පෙරුම් පුරපු මට ..

උබත් පිටු පෑව සඳ ..

සිහිවටනයක් සේ

ඉතිරුවුන

රතු බිල ..

තුරුළු කරන්

හඩමි මම ..

බිල දරා ගන්නට බැරිව ...

Aug 22, 2012

උඹට වැඩියෙන් රිදෙන්නේ ..මගේ හිත ..

තවමත් ඉස්සර වගේ

තමයි ..

වචනයක් .. දෙකක් එකට අමුනගෙන

ගොත නොගහ ..

උඹත් එක්ක කතා කරන්නේ

බොහොම අමාරුවෙන් ....

උබේ ඉස්සරහ

හිටන් ඉන්න එක මොහොතක්

මට දැනෙන්නේ ..

කල්පයකට සක්වලම

එකම තැනක නැවතිලා වගේ ...

තාත්තෙක් නැති ගානට වැටුන

මගේ ලෝකේ ..

ඇත්තටම උඹ මට අප්පුච්චෙක් ..

ඇස් දෙකට පෙන්නන්න බැරි උනත් උඹට මාව

හොරෙන් හරි උබේ පස්සෙන් වැටෙන්නේ

හිත හයිය නැති නිසා මගේ ... උඹ නැතුව ඉන්න ..

එත්

හිත හයිය උඹ .. ..

ගත වාරු නැති කල ...

අමාරුවෙන් ඔහොම වරු අරගෙන ඇවිදින කොට ..

උඹට වැඩියෙන් රිදෙන්නේ ..මගේ හිත ..

මගේ ආයුෂත් අරගෙන

ඉක්මනට

හොඳ වෙයන්...

ලොකු අයියේ ..

අමාරුයි මට මේ දුක දරන්න ...

Jul 21, 2012

ආයෙමත් වතාවක් හමු නොවේවි අපි..

ආයෙමත් වතාවක්

හමු නොවේවි අපි..

ආයෙමත් වතාවක් ..

ඔබේ ළඟ දැවටිලා .. හිනාවකින් හිත පුරවාගෙන

සැනසෙන්න ..

ආයෙමත් වතාවක් .. හමු නොවේවි අපි ..

තොර තෝංචියක් නැතිව ..

හිතුමතේ දොඩවන්න ..

මොහොතකට නැවතිලා .. ඇස් දෙකට එබිකම් කරන්න ..

ආයෙමත් වතාවක් .. හමු නොවේවි අපි ..

ආදරේ වැඩි කමට රිදුන හිත ... කාටත් හොරෙන් කඳුළු කැටවලින්

තෙමන්න ..

ඒ කඳුළු කැට හංගලා .. ආයෙමත් හිනාවෙන්න ..

ආයෙමත් වතාවක් .. හමු නොවේවි අපි ..

කියා ගන්න බැරි වෙච්චි .. කතාවක ඉතිරි ටික

කියා දෙන්න ..

ආයෙමත් වතාවක් . හමු නොවේවි අපි ,

ඉතින් මට ආදරෙන් සමු දෙන්න ..

ආයෙමත් වතාවක් .. හමු නොවන්නට

නික්ම යන්නට .. මතකය

විතරක්ක්ම ඉතිරි කොට ...

Jun 12, 2012

'මගේ රස්සාවට , අත නොතබනු !!!'

ඉඳපල්ලකෝ...

මේ

පිඩිත , නිර්ධන පන්තියේ

ඉඳන්

කොහොම හරි සුළු ධනේශ්වර

වෙලා

ඊටත් පස්සේ

ධනේශ්වර වුන දවසක

උඹලා .. හැමෝටම

'රිටර්න්' එක දෙනවමයි ..

එතකම්

මම කියන්නේ මෙච්චරයි

'මගේ රස්සාවට , අත නොතබනු'

May 23, 2012

අනේ අම්මපා ඉන්න බැරි හැටි ගෑනුන්ට ....

සංවේදී නායකයෝ ...

ආඩම්බරකාර තාත්තලා ...

දුටුගැමුණු පර පුරක

නෂ්ටාවශේෂ වෙච්චි

ඇමැත්තෝත් ..

දැහැමින් - සෙමින්

රට කොරන කල ..

පැවිද්දන්..
සිවුර එලලා බිමට
මහවාසලෙන්..

දන් කුඩ .සිඟාගෙන ...

මනරම් බණ දෙසන කොට ..

දේශප්‍රේමී .. සැදැහැවත්

දෙවිවරු වැඩ ඉන්න රට ..

අනේ අම්මපා

ඉන්න බැරි හැටි ගෑනුන්ට

පති වත

නොබිදගෙන ....

ප.ලි. - 23/05/2012 දින ජාතික පුවත් පතක් වූ දිවයින පුවත් පතේ අන්තර්ජාල පිටපතේ පළවූ පුවත් ශිර්ෂ පාඨයන් කීපයකි , අප කොතරම් වාසනා වන්තයින්දැයි කියතොත් ශිර්ෂ පාඨ 5 ම අපරාධ පිලිබඳවය , අති විශේෂිතම දේනම් 4/5 ම ස්ත්‍රී දුෂණ වීමය. මා දන්නා තරමින් ආශ්චර්යමත් මගේ රටේ පිරිමින් අතින් මෙවැනි දේ සිදු විය නොහැක, ගැහැනුන් විසින්ම මෙවැනි දේ කොට ලෝකයා ඉදිරියේ අපි මහත් වූ තිරිසන් ජාතියක් කියා පෙන්වන්නට උත්සහා ගන්නවා විය හැක. නොඅනුමානවම ඔවුනට ඒ සඳහා ඇමෙරිකාව , බ්‍රිතාන්‍ය ප්‍රමුඛ බටහිර අධිරාජ්ජ්‍යවාදීන් ඩොලර් මලු පිටින් ගෙවනු ඇත.

නිමිත්ත: http://www.divaina.com/2012/05/23/provin.html